 |
| ফটোঃনিজা সংবাদদাতা |
ডিজিটেল সংবাদ, নগাঁওঃ নগাঁও জিলাত ডকাইত আৰু অপৰাধী চক্ৰৰ বিৰুদ্ধে নগাঁও আৰক্ষীয়ে অব্যাহত ৰাখিছে তীব্ৰ অভিযান। মঙলবাৰে নিশা জিলাখনৰ ৰাঙলু আৰক্ষী চকীৰ অন্তৰ্গত বৰকন্দলীত আৰক্ষী আৰু ডকাইতৰ দলৰ মাজত এক ভয়ংকৰ গুলীয়াগুলীৰ ঘটনা সংঘটিত হয়। আৰক্ষীৰ প্ৰত্যুত্তৰত চলোৱা গুলীবৰ্ষণত মৰিকলঙৰ চিকিৎসক দম্পতীৰ ঘৰৰ ডকাইতি কাণ্ডৰ মূল মাষ্টাৰমাইণ্ড তথা কুখ্যাত ডকাইত খাইৰুল ওৰফ মণি নিহত হয়।
প্ৰাপ্ত খবৰ অনুসৰি, শেহতীয়াকৈ নগাঁও চহৰৰ মৰিকলঙত চিকিৎসক দম্পতীৰ আৱাসগৃহত সংঘটিত হোৱা চাঞ্চল্যকৰ ডকাইতি কাণ্ডৰ তদন্ত চলাই আছিল নগাঁও আৰক্ষীয়ে। মঙলবাৰে নিশা এক গোপন সূত্ৰৰ পকা খবৰৰ ভিত্তিত আৰক্ষীৰ এটা দলে ৰাঙলুৰ বৰকন্দলী অঞ্চলত ডকাইতৰ দলটোক কৰায়ত্ত কৰিবলৈ এক বিশেষ অভিযান চলায়। আৰক্ষীৰ দলটোৱে ডকাইতৰ ঘাটি ঘেৰাও কৰাৰ সময়তে অপৰাধীৰ দলটোৱে আৰক্ষীক লক্ষ্য কৰি গুলীবৰ্ষণ আৰম্ভ কৰে। আত্মৰক্ষাৰ বাবে আৰক্ষীৰ দলেও প্ৰত্যুত্তৰত গুলী চলাবলৈ বাধ্য হয়। দুয়োপক্ষৰ মাজত হোৱা এই তীব্ৰ গুলীয়াগুলীৰ অন্তত থিতাতে নিহত হয় কুখ্যাত ডকাইত খাইৰুল ওৰফে মণি।
নিহত মণিৰ ঘৰ লক্ষীমপুৰ জিলাত। আৰক্ষীৰ এই অভিযানৰ সময়তে আন্ধাৰৰ সুযোগ লৈ ডকাইতৰ দলটোত থকা আন পাঁচটা সতীৰ্থ ডকাইতে ঘটনাস্থলীৰ পৰা পলায়ন কৰিবলৈ সক্ষম হয়। ইফালে, এনকাউণ্টাৰৰ অন্তত আৰক্ষীয়ে ঘটনাস্থলীৰ পৰা এটা ৭.৬৫ এমএম পিষ্টল, সজীৱ গুলী আৰু খালি কাৰ্টিজ উদ্ধাৰ কৰে। সম্প্ৰতি নগাঁও আৰক্ষীয়ে পলায়ন কৰা আন পাঁচটা ডকাইতক কৰায়ত্ত কৰাৰ বাবে এক তীব্ৰ অভিযান অব্যাহত ৰাখিছে। এই ঘটনাই সমগ্ৰ জিলাখনতে ব্যাপক চাঞ্চল্যৰ সৃষ্টি কৰিছে।